ថៃ គ្រោងដាក់ការគ្រប់គ្រងលើតម្លៃម្សៅមី
លោក Boonchai Srichaiyongpanich ប្រធានសមាគមពាណិជ្ជកម្មម្សៅមីថៃបានមានប្រសាសន៍ថាសមាជិកទីភ្នាក់ងារនាំចេញម្សៅមីបានព្រមព្រៀងសហការគ្នាបញ្ចប់ការទម្លាក់តម្លៃឲ្យក្រុមហ៊ុននាំចូលដែលភាគច្រើនក្រុមហ៊ុនរបស់ចិន ក្នុងគោលបំណងទប់ស្កាត់តម្លៃក្នុងស្រុកមិនឲ្យធ្លាក់ចុះជាបន្ត។
សមាគមពាណិជ្ជកម្មម្សៅមីថៃសមាគមរោងចក្រផលិតម្សៅមីថៃ និងសមាគមម្សៅមីភាគឦសានគ្រោងនឹងចុះហត្ថលេខាលើអនុស្សរណៈយោគយល់ (MoU) មួយស្តីអំពីបញ្ហានេះ។
លោក Boonchai មានប្រសាសន៍ថាអនុស្សរណៈយោគយល់នេះនឹងត្រូវចុះហត្ថលេខានៅសប្តាហ៍នេះដោយមានក្រសួងពាណិជ្ជកម្មធ្វើជាសាក្សី។
លោកមានប្រសាសន៍ថា៖ «បន្ទាប់ពីអនុស្សរណៈយោគយល់នេះត្រូវបានចុះហត្ថលេខាហើយនោះសមាគមពាណិជ្ជកម្មម្សៅមីថៃនឹងចេញតម្លៃនាំចេញម្សៅមីគោលមួយធ្វើជាគោលការណ៍ណែនាំសម្រាប់ក្រុមហ៊ុននាំចេញរៀងរាល់ពីរខែម្តង»។
បច្ចុប្បន្នម្សៅមីត្រូវបានដាក់លក់ក្នុងតម្លៃ ១,៩០ បាតក្នុងមួយគីឡូក្រាម។ ទោះជាយ៉ាងនេះក្តីក្រុមហ៊ុននាំចេញមួយចំនួនដែលមានរោងចក្រធំៗ និងការចំណាយថ្លៃដើមទាបបានលក់ម្សៅមីក្នុងតម្លៃ ១,៣០ បាតក្នុងមួយគីឡូក្រាម ដោយធ្វើឲ្យប៉ះពាល់ដល់ផលប្រយោជន៍របស់ក្រុមហ៊ុននាំចេញ និងកសិករថៃជាច្រើន។
លោក Boonchai បានមានប្រសាសន៍ថា៖ «យើងរំពឹងថាសកម្មភាពនៃកិច្ចសហប្រតិបត្តិការនេះនឹងបញ្ចប់ការធ្លាក់ថ្លៃដែលកំពុងធ្លាក់ចុះដោយសារសម្ពាធពីក្រុមហ៊ុននាំចេញមួយចំនួន»។
លោកបានបន្តឲ្យដឹងទៀតថាសមាគមនឹងពិនិត្យតាមដានបញ្ហានេះឲ្យបានហ្មត់ចត់ ហើយក្រុមហ៊ុននាំចេញដែលរំលោភគោលការណ៍ណែនាំថ្មីនេះនឹងទទួលបានការព្រមានហើយអាចប្រឈមនឹងការហាមឃាត់មិនឲ្យនាំចេញម្សៅមីរបស់ថៃទៀតផង។
សមាគមទាំងនេះក៏បានស្នើសុំឲ្យមានការអង្កេតឲ្យកាន់តែតឹងរ៉ឹងថែមទៀតនៅតាមព្រំដែន ដើម្បីទប់ស្កាត់មិនឲ្យមានការរត់ពន្ធម្សៅមីចេញពីប្រទេសជិតខាង។ ការរត់ពន្ធខុសច្បាប់នេះនឹងជំរុញឲ្យមានកំណើនផ្គត់ផ្គង់ដែលនឹងធ្វើឲ្យតម្លៃជួបបញ្ហាធ្លាក់ចុះ។
ប្រទេសថៃផលិតដំឡូងមីចំនួនពី ៣០ ទៅ ៣២ លានតោនក្នុងមួយឆ្នាំ។ ដំឡូងមីភាគច្រើនត្រូវបានផលិតចេញជាម្សៅមី ចំណិតដំឡូងមី និងផលិតផលផ្សេងទៀតសម្រាប់នាំចេញ។ បច្ចុប្បន្នការនាំចេញមានទំហំសរុបពី ៥ ទៅ ៧ លានតោនក្នុងមួយឆ្នាំគិតជាសាច់ប្រាក់មានចំនួន ១០០ ទៅ ១២០ លានបាត។
លោក Boonchai មានប្រសាសន៍ថាការនាំចេញម្សៅមីថៃអាចនឹងកើនឡើង ១០ ភាគរយក្នុងឆ្នាំនេះដល់ ៦,៥ លានតោន៕
·
0