កំពតៈ កសិករដាំម្រេច GI កំពត
ដែលមានដើមទុនតិចតួចកំពុងប្រឈមនឹងការលក់ចេញ
ខណៈក្រុមហ៊ុនបញ្ជាទិញសម្រាប់នាំចេញ
ក៏បានពង្រីកការវិនិយោគលើការដាំដុះម្រេចផ្ទាល់ខ្លួនផងដែរដោយបានកាត់បន្ថយការទិញពីកសិករ។
នេះបើយោងតាមអ្នករកស៊ីនៅក្នុងឧស្សាហកម្មនេះ
ដែលបានប្រាប់ភ្នំពេញប៉ុស្ដិ៍កាលពីថ្ងៃម្សិលមិញ។
លោក ងួន ឡាយ ប្រធានសមាគមលើកកម្ពស់ម្រេចកំពត (KPPA)
បានឲ្យដឹងកាលពីម្សិលមិញថា
នេះគឺជាបញ្ហាប្រឈមផ្សេងទៀតនៅក្នុងវិស័យនេះ ខណៈ KPPA
កំពុងជម្នះនឹងផលិតផលក្លែងក្លាយនៅលើទីផ្សារ។
លោកថ្លែងថា មកដល់ពេលនេះ ម្រេចបានសល់នៅក្នុងស្ដុកប្រហែល ៣០ តោន ជាលើកដំបូងហើយក្នុងឧស្សាហកម្មនេះ។
លោកលើកឡើងថា៖
«វាជាលើកដំបូងដែលគ្រាប់ម្រេចរបស់យើងនៅសល់នៅក្នុងស្ដុក
ជាធម្មតាស្ដុករបស់យើងអស់ហើយនៅអំឡុងពេលនេះ
វាមិនមែនជាបញ្ហាដោយសារតម្រូវការទីផ្សារ
ឬការចំណាយរបស់វានោះទេ»។
លោកបន្ថែមថា នេះដោយសារតែអ្នកទិញមានម្រេចផ្ទាល់ខ្លួនរបស់ពួកគេ ហើយកាត់បន្ថយការទិញពីកសិករ។
លោកថ្លែងថា៖ «វាជាបញ្ហាមួយសម្រាប់សមាគម
នៅពេលក្រុមហ៊ុនវេចខ្ចប់ក្នុងស្រុករបស់យើង [អ្នកទិញ]
គិតអំពីផលិតផលគេជាមុននោះ»។
យោងតាមលោក ងួន ឡាយ KPPA លក់ម្រេចបាន ៤៥
តោនប៉ុណ្ណោះទៅក្នុងទីផ្សារអន្តរជាតិនៅឆ្នាំនេះ
ក្នុងចំណោមម្រេចមានគុណភាពខ្ពស់ ៨០ តោន។
លោកឡាយ បញ្ជាក់ថា តម្លៃម្រេចនៅតែរក្សាក្នុងតម្លៃ ១៥
ដុល្លារក្នុងមួយគីឡូក្រាមសម្រាប់ម្រេចខ្មៅ
២៥ដុល្លារសម្រាប់ម្រេចក្រហម និង ២៨ ដុល្លារ សម្រាប់ម្រេចស។
លោកបន្តថា ម្រេច GI កំពត រកបានប្រាក់ចំណូលប្រហែល ១
លានដុល្លារប្រចាំឆ្នាំ។ បច្ចុប្បន្ន សមាជិករបស់ KPPA
បានកើនឡើងដល់ ៣៨៧ គ្រួសារ
ហើយធ្វើដៃគូជាមួយក្រុមហ៊ុនវេចខ្ចប់ក្នុងស្រុកចំនួន ២១
សម្រាប់ការនាំចេញទៅទីផ្សារអន្តរជាតិ។
ការដាំដុះម្រេចកំពតរបស់សមាជិក KPPA សរុបបានកើនឡើងដល់ ២១០,៤
ហិកតា ក្នុងចំណោមនោះផ្ទៃដី ១០០ ហិកតា
ត្រូវបានត្រៀមរួចរាល់ក្នុងការប្រមូលផល។
ប៉ុន្តែ ខណៈម្រេចកំពតដែលទទួលបានឋានៈ GI ពេញនិយម
ហើយមានកេរ្ដិ៍ឈ្មោះល្អនៅក្នុងទីផ្សារអន្តរជាតិ លោក ឡាយ ឲ្យដឹងថា
ចង្វាក់ផ្គត់ផ្គង់នៅតែកើនឡើងខ្លាំង ខណៈ KPPA
កំពុងស្វែងរកដៃគូបញ្ជាទិញថ្មី។
លោកថ្លែងថា៖ «នៅពេលនេះទើបយើងដឹងថា នេះជាចំណុចខ្សោយរបស់យើង
នៅពេលនេះយើងកំពុងស្វែងរកដៃគូថ្មីសម្រាប់ការវេចខ្ចប់
និងការនាំចេញ»។
កសិករ ប៉ិត សំអឿន ដែលបានដាំដុះម្រេចអស់រយៈពេល ២០ ឆ្នាំ
លើផ្ទៃដីកន្លះហិកតាបានឲ្យដឹងថា
នេះគឺជាឆ្នាំដំបូងដែលលោកប្រឈមនឹងបញ្ហាលក់ចេញ។
លោកថ្លែងថា៖ «ជាធម្មតា
ខ្ញុំបញ្ចប់ការលក់ម្រេចរបស់ខ្ញុំទាំងអស់បន្ទាប់ពីការប្រមូលផលប្រហែលជានៅខែមិថុនា
នេះគឺជាលើកដំបូងដែលម្រេចរបស់ខ្ញុំលក់មិនចេញ»។
លោកបន្តថា៖«ខ្ញុំកំពុងបារម្ភអំពីប្រាក់ចំណូលរបស់គ្រួសារខ្ញុំ
ប្រសិនបើសមាគមមិនអាចស្វែងរកដៃគូថ្មីបាន»។ លោក ប៉ិត សំអឿន
ប្រមូលម្រេចបានប្រហែល ៧០០ គីឡូក្រាមនៅឆ្នាំនេះ។
លោក ហ៊ឹម ពិសិដ្ឋ នាយកផ្នែកផលិតកម្មរបស់ក្រុមហ៊ុន ខនហ្វីរេល
ជាក្រុមហ៊ុនដៃគូដ៏ធំមួយជាមួយ KPPA បានឲ្យដឹងថា
ក្រុមហ៊ុននៅតែរក្សាការទិញពីកសិករ
ប៉ុន្តែគ្រាន់តែក្នុងបរិមាណមិនច្រើនដូចមុន។
លោកថ្លែងថា៖«យើងដឹងថា KPPA កំពុងអន់ចិត្តជាមួយយើង
ប៉ុន្តែក្នុងនាមក្រុមហ៊ុនធ្វើអាជីវកម្ម
យើងចាំបាច់ត្រូវគិតអំពីប្រាក់ចំណេញជាមុន ប៉ុន្តែវាមិនមានន័យថា
យើងបញ្ឈប់ការទិញពីពួកគេនោះទេ»។
លោកបន្តថា៖ «ទោះបីជា KPPA កំពុងស្វែងរកដៃគូថ្មី
វានឹងមិនប៉ះពាល់ដល់ពួកយើងទេ
ដោយសារយើងកំពុងរៀបចំចង្វាក់ផលិតកម្មរបស់យើងឲ្យរួចរាល់ហើយ
ហើយពួកគេគួរតែរៀបចំឲ្យបានល្អសម្រាប់ចង្វាក់ផ្គត់ផ្គង់និងចាត់វិធានការឲ្យបានទាន់ពេលវេលា»។
លោកស្រី សឹង សុផារី អ្នកនាំពាក្យក្រសួងពាណិជ្ជកម្មបានឲ្យដឹងថា
ក្រសួងពាណិជ្ជកម្មមិនអាចជ្រៀតជ្រែកជាមួយក្រុមហ៊ុនឯកជនបានទេ
ដោយសារវាជាទីផ្សារសេរី
ព្រោះក្រសួងបានជួយរួចហើយក្នុងការបង្កើតទីផ្សារ និងកេរ្ដិ៍ឈ្មោះ
ដូច្នេះសមាគមគួរតែវៃឆ្លាតក្នុងការជ្រើសរើសដៃគូត្រឹមត្រូវដើម្បីការពារអត្ថប្រយោជន៍របស់ពួកគេ។
លោកស្រីថ្លែងថា៖ «ម្រេចកំពតល្បីឈ្មោះរួចហើយនៅលើទីផ្សារ
វាមិនពិបាកក្នុងការស្វែងរកដៃគូថ្មីនោះទេ
សមាគមគួរតែវៃឆ្លាតក្នុងរៀបចំយុទ្ធសាស្ដ្រការពារអត្ថប្រយោជន៍ទាំងមូល»៕